Улусный конкурс ледовых скульптур среди семейных команд «Хрустальная сказка»

Амматааҕы эдэтуристар станциялара уонна нэһилиэк дьаһалтата көҕүлээһиннэринэн дьиэ кэргэнинэн муус оҥоһуктары чочуйуу күрэхтэһиитэ аан бастаан ыытылынна.


Амматааҕы эдэр туристар станцияларын базатыгар «Курустаал остуоруйа-2020» дьиэ кэргэнинэн муус оҥоһуктары чочуйуу күрэхтэһиитэ аан бастаан ыытылынна. Тэрийээччилэринэн станция дириэктэрэ Николай Николаев уонна Амма нэһилиэгин дьаһалтатын баһылыга Михаил Артемьев буоллулар. Манна Амматтан Аполлон Захаров быраата Стас Федотовтыын, Власий Пестерев быраата Павел Слепцовтуун,  Егор Баранов сиэнэ Ромирдыын, Чакыртан Тихон Матвеев уола Диланныын кытыннылар. Дьүүллүүр сүбэҕэ дириэктэр Николай Николаев, методист Геннадий Иванов, нэһилиэк исписэлииһэ Давид Федоров үлэлээтилэ

   

   

Бастаабыт хамаанда 15 тыһыынчалаах сэртипикээтинэн уонна сайын турист базатыгар 10 киһи сынньанарыгар путевканан, иккис миэстэлээх 10 тыһыынчалаах сэртипикээтинэн уонна үс күннээх өрүһүнэн устар путевканан, үһүс миэстэлээх 5 тыһыынчалаах сэртипикээтинэн уонна үс күннээх өрүһүнэн устар путевканан, биһирэммит 3 тыһыынчалаах сэртипикээтинэн уонна базаҕа дьиэ кэргэнинэн биир күннээх сынньалаҥынан наҕараадаланнылар.

Григорий Попов, эбии үөрэхтээһин педагога: «Ыарыынан хааччахтааһын кэмигэр оҕолорбутун кытыннарар санаанан салайтаран, муус ылбыппытыттан тэптэрэн, сэргэх күрэхтэһиини тэрийдибит. Оҕо тэрилтэтэ буоларбыт быһыытынан, бастатан туран, оҕолорбутун дьарыктыыр баҕалаах этибит. Станциябыт эр дьоно бары муус ылан күрэхтэһии хара үлэтин барытан оҥордубут, бэлэмнээтибит. Маастардар бэйэлэрэ сөбүлэнэн, сэрэбиэйинэн талбыт персонажтарын оҕолору кытта оҥордулар. Күрэхтэһии олус холкутук, чэпчэки тыынынан барда. Кыттааччыларбытыгар бириистэрин таһынан илимнээн ылбыт сибиэһэй балыкпытын барыларыгар кэһии гынныбыт».

Аполлон Захаров, Амма нэһилиэгэ, муус оҥоһук кыайыылааҕа: «Түөлбэбит салайааччыта Светлана Артемьева күрэхтэһиигэ кытын диэн бастакынан эппитэ. Ол иһин хамаандабытын олорор түөлбэбитинэн «Хардыы» диэн ааттаабыппыт. Бэйэм ОДьКХ үлэһитэбин. Аҕам Аполлон Дмитриевич Захаров тутууга үлэлээбитэ, маһынан бэйэтин наадатын барытын, мончуугу оҥороро. Аан маҥнай төрөппүт быһыытынан оҕо саадыгар хаар оҥоһуктарга холоммутум. Салгыы тэрилтэлэр көрүүлэригэр кыттан барбытым. Бу күрэхтэһии нэһилиэктэн тэйиччи Амма кэрэ миэстэтигэр ыытылынна, сылаас дьиэлээх, итии чэйдээх усулуобуйа барыта оҥоһулунна. Аймах дьону сомоҕолуур бэртээхэй күрэхтэһии буолла. Быраатым Стас илиитинэн  тутан – хабан тэбис – тэҥҥэ үлэлээтэ. Эр дьон буоларбыт быһыытынан бирииспитин аҥаардаһыахпыт. Бу аймахтаһыыга улахан суолталаах уонна оҕо сайдарыгар улахан тирэх буолар күрэхтэһии эбит диэн сыаналаатым».

Николай Николаев, эдэр туристар станцияларын дириэктэрэ: «Саас аайы базабытыгар хаҥкылыыр, сырылыыр  сирбитигэр олохтоох дьон, тэрилтэлэр, дьиэ кэргэн, оскуола оҕолоро кэлээччилэр. Кыыс Аммабыт мууһун туһанан ыыппыт күрэхтэһиибитин үгэскэ киллэрэммит сыл аайы тэрийэр, кыттааччылара элбээн иһэригэр, хамаанда чилиэннэрин ахсааннарын эбэн, үлэни кэҥэтэн иһэр баҕалаахпыт. Өйүүр дьон баар буоллахтарына кэлин өрөспүүбүлүкэ да таһымыгар таһаарар толкуйдар эмиэ киирэллэр. Муус оҥоһукка кыайбыт маастардар бириис быһыытынан сайын Кыыс Амма устун биһиги тэрилтэбит оҥорор өҥөтүнэн туһанан өрүһүнэн устан кэрэ айылҕабытын көрөр кыахтаныахтарын сөп. Бу күрэхтэһии тыйыс тымныыга уһун күнү быһа үлэлээбит оҕолорбутугар тулууру, дьулууру, сатабылы сайыннарар тургутуу уонна иитии биир көрүҥэ буолар. Биһигини тута өйөөбүт Амма нэһилиэгин баһылыгар Михаил Алексеевич Артемьевка улахан махталбытын тириэрдэбит. Инники өттүгэр бу күрэхтэһиибит Амма аатын ааттатар улахан тэрээһин буоларыгар баҕа санаабыт улахан».

Ааптар: Алтана Артемьева

Издание: «Газета «Амма олоҕо»»