«ЮНИФАЙД» в Амгинском улусе

Амматааҕы анал интэринээт-оскуола Бүтүн Арассыыйатааҕы анал Олимпиада бырайыагар кыттан, улахан сүүмэрдээһини ааһан кыайыылааҕынан ааттанна.


Амматааҕы анал интэринээт-оскуола Бүтүн Арассыыйатааҕы анал Олимпиада бырайыагар кыттан «Юнифайд» хамсааһын туризм хайысхатыгар кыайыылааҕынан таҕыста уонна гранын тутта. Былырыыҥҥыттан Саха сиригэр саҕаламмыт анал Олимпиада Президенинэн Ил Түмэн үөрэхтээһиҥҥэ, наукаҕа, иһитиннэрэр-биллэрэр тэрилтэлэр сис кэмитиэттэрин бэрэссэдээтэлэ Феодосия Габышева, толорооччу дириэктэринэн Вера  Жерготова буолаллар.

     

Бу саас Дьокуускай куоракка түмсүү көҕүлээһининэн Арассыыйа анал олимпиадатын генеральнай дириэктэрин бастакы солбуйааччыта Москубаттан Мария Ракова уонна Гамбургтан куратор Матиас Бургхард кыттыылаах «Юнифайд» хамсааһыны сайыннарар сыаллаах ыытыллыбыт семинарга  Амматааҕы анал интэринээт-оскуолатын дириэктэрэ Павел  Петров уонна оскуола физкультураҕа учуутала Гаврил Чемезов ыҥырыллан сылдьаннар улаханнык сэҥээрбиттэрэ.

Гаврил Федорович бу улахан тэрээһиҥҥэ оҕону сайыннарар үлэтин уопутун билиһиннэрбитэ. Билигин кини бу бырайыакка сүрүн сүбэһит быһыытынан, оттон дириэктэри иитэр үлэҕэ солбуйааччы Татьяна Терентьева салайааччынан үлэлиэхтэрэ. Оскуола-интэринээт Николай Николаев дириэктэрдээх эдэр туристар станцияларын кытта биир сүбэнэн үлэлэрин саҕалаатылар. Бастакы тэрээһини ыытыыга эбии үөрэхтээһин педагогтара Павел Иванов, Семен Габышев, методист Саргылана Федорова сүбэ-ама, күүс көмө буоллулар.

«Сайын уоппускам кэмигэр Арассыыйатааҕы көрүүгэ кыттыбытым. Бу улахан тэрилтэ штаб кыбартыырата Москубаҕа, аан дойдутааҕы киинэ Германияҕа баар. Арассыыйаҕа генеральнай спонсора «Кока-Кола» хампаанньа буолар. Хампаанньа ирдэнэр тэриллэри, мэтээллэри, бириистэри барытын хааччыйар. Аммаҕа эдэр туристар станцияларын кытта эрдэттэн кэпсэтэммин бииргэ үлэлиэх буолбуппут. Грант харчыта кэлэн оҕолорго турист туттар тэриллэрин сакаастаатыбыт.

Бу хамсааһыны улууска бастакынан саҕалаатыбыт, өрөспүүбүлүкэҕэ «Юнифайд» туризмы сайыннарар соҕотох оскуола буолабыт. Бу тылы кылгастык быһаардахха, доруобай уонна доруобуйаларынан хааччахтаах оҕолор биир хамаанда буолан күрэхтэһиигэ кыттыылара буолар. Ол аата бу хамсааһын сүрүн сыалынан-соругунан доруобуйаларынан хааччахтаах оҕолор доруобай оҕолору кытта бииргэ сылдьан күрэхтэһиилэрэ уонна кинилэри олоххо, чөл олоххо көҕүлээһин буолар», – диэн этэр учуутал Гаврил Чемезов. Ааптар:

Алтана Артемьева
Издание: «Газета «Амма олоҕо»»