Амма улууһун эдэр туристара өрөспүүбүлүкэҕэ бастыҥнар ахсааннарыгар киирдилэр. Станция 20 сыллаах үбүлүөйүгэр дьоһун бэлэх оҥоһулунна.
Амма туристара Дьокуускай куорат аттыгар баар Табаҕа сиригэр – уотугар өрөспүүбүлүкэтээҕи туристар күрэхтэһиилэригэр ситиһиилээхтик кытыннылар. Манна 7 улуустан уонна Табаҕа, Дьокуускай оскуолаларыттан, барыта 13 оҕо тэрилтэлэрэ билиилэрин тургуттулар.
Анал тэриллээх кыттааччыларга Амматааҕы эдэр туристар станциялара Егор Дьячковскай салайааччылаах улахан бөлөҕө уонна Григорий Попов салайааччылаах орто бөлөҕө иккис миэстэлэри ыллылар. Бу көрүҥҥэ 25 миэтэрэлээх быалар, хас биирдии оҕоҕо каска, альпинист карабиннара, жумар, «восьмеркалар», страховкалыыр систиэмэ ирдэнэллэр. Анал тэрилэ суох кыттааччыларга улахан бөлөххө Сарыал Колодезников салайааччылаах Абаҕа орто оскуолата бастакы миэстэни ылла. Оттон Павел Иванов салайааччылаах Амматааҕы эдэр туристар станцияларын орто бөлөҕө иккис миэстэ буолла. Биирдиилээн бастыыр иһин спортивнай туризмҥа бэйэлэрин саастарыгар Саша Чен, Владмир Колосов, Арчылаан Иванов бастакы, Саяна Обоева үһүс миэстэ буоллулар. Бу көрүҥ түмүгүнэн станция хамаандата кыайыылааҕынан таҕыста. Спортивнай ориентированиеҕа Катя Кралина бастакы, Айаана Васильева, Арчылаан Иванов үһүс миэстэни ыллылар. Икки күрэхтэһии түмүгүнэн кыайыылаах түөрт оҕо Владивосток куоракка «Океан» оҕо лааҕырыгар сынньанар путевканан, ол иһигэр станцияттан Арчылаан Ивановнаҕараадаланнылар. Амма туриһа өссө Саха сирин хамаандатын састаабыгар киирэн Владивостокка баран кыттар быраабы ылла.
«Туризм ыксаллаах балаһыанньаларга бэйэни салайынарга, сирдэтинэргэ, айылҕа уустук усулуобуйатыгар, билбэт сиргэр сылдьан түргэнник толкуйдуурга, бары сатабылларга үөрэтэр, күүһү – уоҕу эрчийэр, күүстээх санаалаах буоларга, төрөөбүт түөлбэҕин билэргэ, айылҕаны таптыырга иитэр», — диэн күрэхтэһии кыайыылааҕа Арчылаан Иванов санаатын үллэстэр.
Идэтинэн география учуутала Григорий Попов аан маҥнай 1999 сыллаахха эдэр туристар станцияларын тэрийэн күн бүгүнүгэр диэри ситиһиилээхтик салайар. Эбии үөрэхтээһин тэрилтэтин 20 сыллаах устуоруйатыгар үгүс оҕо иитиллэн, улахан түһүлгэлэргэ кыайыы өрөгөйүн билбитэ. Быйылгы үөрэх дьылыгар станция «Дружба» спорт комплексыгар көһөн үлэлээтэ. Станция үбүлүөйдээх сылыгар үлэ оргуйар үөһүгэр сылдьар, бэйэтин устуоруйатыгар саҥаттан саҥа ситиһиилэри сурунар.
Ааптар: Алтана Артемьева