Аммаҕа оҕолор муус аннынан балыктааһыҥҥа күрэхтэстилэр

Амматааҕы эдэр туристар ыстаансыйаларын (дириэктэр Николай Николаев) тэрийиитинэн Аҕа сылыгар анаммыт муус аннынан балыктааһыҥҥа үөрэнээччилэр хамаандаларын икки ардыларыгар ыытыллыбыт улуустааҕы күрэхтэһии Бөтүҥ нэһилиэгин Кыыбааҕы сиригэр Амма өрүскэ буолла.

Муус анынан балыктааһыҥҥа Амматтан, Бөтүҥтэн, Чакыртан улахан кылааска үөрэнэр түөрт уол, икки кыыс хамаандаҕа киирэннэр ойбону тэһиигэ, хаарга куобахтааһыҥҥа, хомуур хапсаҕайга, биктэриинэҕэ, ох саанан ытыыга уонна балыктааһыҥҥа күрэхтэстилэр. Түмүккэ бастакы миэстэни Амма 2 нүөмэрдээх орто оскуолатын «Молот» (салайааччы Семен Килбясов) хамаандата бастакы, Чакыртан «Эрэл» (салайааччы Тихон Матвеев) иккис, Амма 2 нүөмэрдээх орто оскуолатыттан «Топор» (салайааччы Семен Килбясов) үһүс миэстэ буоллулар. Ыстаансыйа методиһа Геннадий Иванов бэлиэтииринэн, муус аннынан балыктааһын быйыл аан бастаан ыытыллыбыт. Бу оҕолору айылҕаҕа сыһыарар, балыктааһыҥҥа, сиргэ — дойдуга тутта — хапта сылдьарга үөрэтэр тэрээһин буолар. Оҕолор чэбдик салгыҥҥа дуоһуйа сынньанан, элбэҕи билэн -көрөн, үөрэнэн, дьиэлэригэр үөрэн — көтөн балыктаах бардылар.

«Сыл аайы куйуурга көтүппэккэ кыттан кэллибит, оҕолорбутун айылҕаҕа сыһыарабыт, балыктааһыҥҥа үөрэтэбит. Ааспыт сылга күрэхтэһиибит Молуодаҕа буолбута. Быйыл аан бастаан муус аннынан балыктаатыбыт. Хамаандабытыгар Дилан Неустроев, Вадим Трифонов, Айтал Максимов, Ринат Гавирльев, Мичийэ Кириллина, Амелия Новикова киирэннэр күрэхтэстилэр. Ахсааммыт тэҥнэһэн хаалан, балыктааһын түһүмэҕинэн иккис миэстэ буоллубут. Нэһилиэкпит аҕалара уолаттарын кытта улуустааҕы күрэхтэһиигэ Федоровтар бастакы миэстэни ыллылар, Николаевтар эмиэ ситиһиилээхтик кытыннылар, Байанай күрэһигэр нэһилиэкпит икки хамаанданы туруоран икки инники миэстэлэри ылбыттарыттан эмиэ үөрүүбүт улахан», — диэн этэр салайааччы Тихон Матвеев.